Республикатааҕы “Забота-Арчы” хаһыат олунньу 22 күнүнээҕи таһаарыытыгар Людмила Ноговицына “Хорсун хамандыырга герой аата иҥэриллиэхтээх” диэн төбөлөөх саха уола сержант Василий Данилов туһунан ыстатыйатын ааҕан баран, Дьокуускайтан Анна Емельянова санаатын үллэстэргэ сананна.

Украинаҕа буола турар спецоперацияҕа дойдубуттан элбэх ыччат кытта сылдьар. Буойун Василий Данилов холобуруттан, хаһыаттартан да аахтахха, хабыр хапсыһыыларга саха уолаттара хорсуннук киирсэ сылдьалларыттан киэн туттабыт. Оттон Василий туһунан суруйдахха, аҕата эрдэ өлөн кыһалҕа диэни билэн улааппыт, абаҕатын батыһан ханнык да үлэттэн чаҕыйбакка, олох оскуолатын барбыта көстөр. Кини ити иитиитэ олоҕор, байыаннай сулууспатыгар да улахан көмөнү биэрбитэ саарбаҕа суох. Туохтан да толлон туран хаалбат буоларга иитиллибит. Тапталлааҕын да буларыгар тус сыалын толоро үөрэммит иитиитэ көстөр. Киһи быһыытынан көнөтө, чиэһинэйэ, хорсуна Украинаҕа Павловка дэриэбинэ таһыгар күүстээх ытыалаһыы кэмигэр командир быһыытынан, сэриилэһэр уопуттаах буолан, күүстээх ытыалаһыы кэмигэр саҥа кэлбит мобилизованнай уолаттары, ол иһигэр биир дойдулаахтарын олохторун быыһаары, ытыалаһыы толоонуттан эчэйбиттэри харса суох таһаартыы сылдьан өлүү буулдьата бэйэтин ситэн,  эдэркээн олоҕо быстыбыт. Тапталлаах кэргэнэ, икки кыракый кыысчаана тулаайах хаалбыттар. Василий олоҕо кылгас да буоллар чаҕылхай! Ама  маннык саха буойуна эдэр ыччаттарга  сэрии геройун быһыытынан холобур буолара омнуоланыа, туорайдаһа сылдьыллыа дуо? Биллэн турар суох!

Саха уолаттара бу спецоперацияҕа дойдуларын чиэһин хорсуннук көмүскүүр туһуттан олохторун да биэрэн туран киирсэллэрэ сержант Василий Данилов холобуруттан көстөр. Маннык ытыалаһыы толоонугар геройдуу охтубут Василий Даниловы Герой аатыгар туруорсан, аат биэрэллэрин ситиһэн, кинилэр холобурдарыгар эдэр ыччаты патриотизм тыыныгар иитэргэ сөп буолуо этэ.

Василий Даниловка Россия геройа ааты иҥэрэргэ биир дойдулаахтара Уус Алдан Бороҕонун олохтоохторо туруорсар үлэни саҕалаабыттарын аахтым. Общественность, норуот итинник хорсун ыччаппытынан киэн туттабыт. Мин биир бэйэм бороҕоттор туруорсалларын өйүүбүн уонна Ил Дархан, правительство дьон-норуот ис санаатын, туруорсуутун ылынан көмөлөһөллөрүгэр эрэнэбин.

Анна Емельянова, Дьокуускай к.