Олунньу 21 күнүгэр Москуба бириэмэтинэн 12:00 чааска аан дойду улахан болҕомтото Арассыыйа Бэрэсидьиэнэ Владимир Путин дойду Федеральнай Мунньаҕар Этиитигэр туһаайылынна. Бэрэсидьиэн Этиитин дьокутааттары, сенатордары таһынан байыаннай эпэрээссийэ кыттыылаахтара иһиттилэр. Дойду Бэрэсидьиэнин Этиитэ бу даатаҕа сөп түбэһиитэ мээнэҕэ буолбата, диир Чурапчы улууһун баһылыга Степан Саргыдаев:

— Лоп курдук, сыл анаар өттүгэр бу күн, 2022 сыл олунньу 21 күнүгэр, РФ Бэрэсидьиэнэ Владимир Путин РФ Федеральнай Мунньаҕар ЛНӨ уонна ДНӨ сүбэрэнитиэттэрин билиниигэ этиитин иһитиннэрбитэ, Луганскай Норуодунай Өрөспүүбүлүкэни кытта салайааччы доҕордуу, бииргэ үлэлээһин уонна хардарыта көмөлөһүү тустарынан дуогабарга илии баттаспыта.

Көһүтүллүбүтүн курдук, Бэрэсидьиэн Этиитигэр байыаннай эпэрээссийэҕэ, экэниэмикэҕэ, социальнай эйгэҕэ ордук улахан болҕомтону туһаайда. Бастатан туран, В.В.Путин бу Этиитин Арассыыйаҕа олус уустук, тыҥааһыннаах, аан дойдуга тосту уларыйыылаах кэмҥэ иһитиннэрэрин бэлиэтээтэ. Итиэннэ тута байыаннай эпэрээссийэ суолтатыгар тохтоон, бу боппуруоска «судаарыстыба иннигэр турар соруктары бииртэн биир утумнаахтык быһаарыахпыт» диэн бигэтик этиитэ биһиги кыайыыга эрэлбитин күүһүртэ. “Биһиги бэйэбит дьиэбитин уонна дьоммут олоҕун көмүскүүбүт, арҕаалар сыаллара – тугунан да хааччахтаммат былаастаныы”, — диэтэ кини.

Маны сэргэ Бэрэсидьиэн байыаннайдарга уонна кинилэр дьиэ кэргэттэригэр социальнай өйөбүл миэрэлэрин күүһүрдэр соругу туруорда. Хас биирдии байыаннай сулууспалаах дьиэ кэргэнигэр сыһыарыллыбыт социальнай үлэһит ананыахтааҕын, дьиэ кэргэттэргэ уонна байыаннай эпэрээссийэ бэтэрээннэригэр көмө, өйөбүл оҥорууга Анал пуонда тэриллиэхтээҕин, ол эрээри олохтоох былаастар бу пуондаҕа сигэнэн найыламматтарыгар кытаанахтык этиитэ сөптөөх. Чурапчы улууһугар бу боппуруоска улахан болҕомто ууруллан, үлэ бара турар. Байыаннай эпэрэссийэҕэ олохтон туораабыт буойуттар, ону сэргэ бэтэрээннэр дьиэ кэргэттэригэр тус аадырыстаах көмөнү оҥорор соругу толоруу бу — улахан эппиэтинэс.

Салгыы Бэрэсидьиэн дойду экэниэмикэтин сайдыыта саҥалыы таһымҥа тахсан эрэрин, үгүс хайысхаларга күүстээх хамсааһын тахсар кыахтааҕын ыйда. Арассыыйа инникитин ис кыаҕын арыйан, бэйэтин күүһүнэн, сатабылынан, төрүт үгэстэригэр тирэҕирэн салгыы сайдыаҕар улахан эрэллээҕин биллэрдэ. Дойду салайааччыта култуура, доруобуйа харыстабылын, үөрэхтээһин, социальнай эйгэ хайысхаларынан этиилэрин олоххо киллэриини туһааннаах сокуоннарынан хааччыйарга ыйыыта дойдубут тулхадыйбат туруктааҕын бэлиэтинэн буолла. Онон национальнай уонна олохтоох бырайыактары улууспутугар олоххо киллэриибитигэр биһиэхэ эрэлбит улаатта.
Өссө биир биһирии истибитим — Владимир Путин гаас ситимин босхо тардыы бырагыраамата болдьоҕо суох буолуохтааҕын иһитиннэриитэ. Ол аата, хас биирдии ыал дьиэтин гаас ситимигэр өрүү босхо холбуохпут. Бэрэсидьиэн ОДьКХ реформатыгар, сайдыытыгар уон сыл иһигэр 4.5 трлн солкуобайы көрүөххэ диэн этиитин биһирии иһиттибит. Чурапчы улууһар газ киирбэт 10 нэһилиэгэр муниципальнай бырагырааманы ылынан үлэни саҕалаабыппыт оруобуна бу Этиини кытта сөп түбэһиитэ — биһиги саамай сөптөөх хайысханы тутуһан иһэрбитин туоһутунан буолла. Бу биһигини бу улаханнык үөртэ уонна астыннарда. Онон В.В.Путин түмүккэ эппитинии, кыайыы — биһиги диэки!