САХА СИРЭ. Олунньу 21 күнэ — ULUS.MEDIA. Олунньу 20 күнүгэр  Студеннар инициативаларын киинигэр «Чолбон» уус-уран литература сурунаалын редакцията «Кэриэhим – кэннибэр хааларым: кэхтибэт кэрэкэ тылларым» диэн ааттаах саха омук духуобунай лидерэ, саха судаарыстыбаннаһын төрүттээччи, уһулуччулаах суруйааччы, бөдөҥ учуонай П.А. Ойуунускай төрөөбүтэ 130 сылыгар аналлаах «Чолбон-өй күрэс» интеллектуальнай оонньууну ыытта. Бу сытыы толкуй, өркөн өй куоталаһыытыгар «ZEMA» өрөспүүбүлүкэтээҕи ыччат общественнай тэрилтэтин чилиэннэрэ 14 хамаанданан кытыннылар. Кинилэр Платон Алексеевич оҕо сааhыттан саҕалаан, чаҕылхай кылгас олоҕун кэрдиис кэмнэрин арыйар боппуруостарга бэйэлэрин билиилэрин тургуттулар, элбэҕи саҥаны биллилэр.

«Чолбон» сурунаал бас эрэдээктэрэ Гаврил Андросов: «Аны аҕыйах сүүс сылынан сахалар кэми-кэрдиини Ойуунускай иннинэ эбэтэр Ойуунускай кэнниттэн диэн ааҕар буолуохтара», — диэн бэлиэтээн туран кини Саха сиригэр суолтата уратытын туһунан эттэ.

«Оратор» күрэххэ «Чолбон» сурунаал былырыыҥҥы 4-с нүөмэригэр тахсыбыт “САХА СИРИН АПТАНЫАМЫЙАТЫН ТУҺУНАН” диэн Ойуунускай Омскайга 1921 сыллаахха аахпыт дакылаатын сахалыы тылбааhын дорҕоонноохтук ааҕарга холоннулар. Оонньуу түмүгүнэн 1 м. «Айар тыын» Арктикатааҕы культура уонна искусство судаарыстыбаннай институтун хамаандата, 2 м. «Дархан» Хаҥалас улууһун студеннара, 3 м. «Ураан» Үөһээ Бүлүү студеннара ыланнар дипломнарынан уонна Саха сирин Суруйааччыларын сойууha таhаарбыт “Биhиги Ойуунускайбыт” кинигэтинэн, “Чолбон” сурунаалынан наҕараадаланнылар. «Чолбон-өй күрэс» оонньууну сурунаал эппиэттиир сэкирэтээрэ Туйаара Павлова иилээн-саҕалаан ыытта.

Бу сытыы толкуй, өркөн өй күрэһин сурунаал редакцията салгыы сайыннарар былааннаах. Санатар буоллахха, бу иннинэ, былырыын ахсынньыга, маннык оонньууну саха норуодунай суруйааччыта Баһылай Харысхал айар уонна чинчийэр үлэтигэр ыытыллыбыта.

 «ЧОЛБОН» сурунаал редакцията