Андрей Сорокин хаартыскаҕа түһэриитэ

Соторутааҕыта Саха Өрөспүүбүлүкэтин Ил Дархана Айсен Николаев Ил Түмэн Бэрэссэдээтэлин бастакы солбуйааччы Александр Жиркову кытта көрсөн төрөөбүт тылы харыстааһыҥҥа өрөспүүбүлүкэҕэ ыытыллар үлэ туһунан сүбэлэстэ.

Ил Түмэн бастакы вице-спикерэ Өрөспүүбүлүкэ баһылыгар төрөөбүт тыллары харыстааһыҥҥа уонна сайыннарыыга Ил Дархан ылыммыт дьаһаллара хайдах олоххо киирэн иһэллэрин, уонна тыллары харыстааһын үлэтин инники соруктарын туһунан санаатын эттэ.

Ордук чуолаан Александр Николаевич Өрөспүүбүлүкэҕэ тыллары харыстааһыҥҥа уонна сайыннарыыга Ил Дархан ылыммыт анал бырагырааматын суолтатын, уонна бырагыраамаҕа көрүллүбүт соруктары толорууга Өрөспүүбүлүкэ Бырабыыталыстыбатын, Ил Түмэнин, туһааннаах министиэристибэлэр үлэлэрэ күүһүрүөхтээҕин бэлиэтээтэ.

Төрөөбүт тылы үөрэтиигэ уус уран литература, фольклор, олоҥхо суолталарын ыйан туран, Александр Жирков Өрөспүүбүлүкэ баһылыгар өрөспүүбүлүкэҕэ Олоҥхо дьиэлэрин тиһигин тэрийии, норуот төрүт үгэстэрин харыстыы, тарҕата сылдьааччыларга Ил Дархан анал өйөбүлүн олохтооһун, оҕоҕо аналлаах сахалыы тылынан биэриилэри элбэтии, онтон да атын төрөөбүт тылы харыстаһар, өйүүр дьаһалларын иһин бу эйгэҕэ үлэлэһэ сылдьар дьон аатыттан махталын тириэртэ: “Төрөөбүт тыл инникитин туһугар дьиксинии күүһүрэн иһэр. Тыл мөлтөөн эрэрин дьон көрө сылдьар уонна бэйэтин кыаҕынан итини утары туруулаһа сатыыр. Олору өйүүргэ сөптөөх дьаһаллары Эн ардыгар бэйэҥ да көҕүлээн ылынан, ылыннаран иһэргин дьон-сэргэ өйдүүр, ылынар”, — диэтэ Ил Дархаҥҥа туһаайан Александр Жирков.

Салгыы Александр Жирков уонна Айсен Николаев бу дьыл 22-24 күннэригэр ыытыллыбыт саха тылын, литературатын, култууратын учууталларын II сийиэһин түмүктэрин туһунан кэпсэттилэр.

Саха тылын, литературатын, култууратын учууталларын II сийиэһигэр  өрөспүүбүлүкэ бары улуустарыттан 500-кэ делегат мустан оҕону төрөөбүт тылынан үөрэтиигэ-иитиигэ, оскуолаҕа киириэн иннинээҕи саастаах оҕолорго сахалыы оонньуурдары оҥорууттан, сахалыы мультиктан, киинэлэртэн, оҕоҕо аналлаах бэчээттэн саҕалаан сахалыы эйгэни киэҥник тэрийиигэ, Федеральнай  ыстандаарт киириитэ төрөөбүт тылга дьайыытын, үөрэх уонна эбии үөрэхтээһин, учуобунньуктар уонна босуобуйалар туруктарын, саха оскуолаларын, сахалыы чааһынай оскуолалар о.д.а. боппуруостарга киэҥник кэпсэппиттэрэ, ырытыспыттара, санааларын  үллэстибиттэрэ. Биир сүрүн болҕомто дьиэ кэргэҥҥэ уонна ордук чуолаан оскуолаҕа киириэн иннинээҕи саастаах оҕолор уһуйааннарыгар, бу тэрилтэлэргэ оҕону төрөөбүт тылынан иитиигэ сөптөөх эйгэни тэрийиигэ ууруллуохтааҕа бэлиэтэммитэ. Сийиэс үлэтэ өрөспүүбүлүкэ общественноһын ортотугар улахан сэҥээриини, сэргэхсийиини таһаарбытын бэлиэтиир тоҕоостоох.

Ил Дархан саха тылын, литературатын, култууратын учууталларын II сийиэһин делегаттарын этиилэрэ билигин өрөспүүбүлүкэҕэ оҥоһулла сылдьар төрөөбүт тыллары харыстааһын бырагымаатыгар киириэхтэрэ диэн бэлиэтээтэ. Манна даҕатан эттэххэ, Саха сиригэр олунньу 13 күнүгэр ыытыллыбыт төрөөбүт тыл күнүнэн эҕэрдэтигэр Өрөспүүбүлүкэбит Ил Дархана А.С. Николаев саха тылын, литературатын, култууратын учууталларын II сийиэһин уураахтара туолуутун тус бэйэтин кэтэбилигэр ыларын туһунан иһитиннэриитин уонна өрөспүүбүлүкэ олохтоохторун төрөөбүт тылы харыстаһыыга бүттүүн ылсан үлэлэһэргэ, көмөлөһөргө этиитин дьон-сэргэ улаханнык сэргии, махтана ылынна.

Ил Түмэн пресс-сулууспата.