САХА СИРЭ. ТААТТА УЛУУҺА. Олунньу 17 күнэ. Таатта улууһун баһылыга Михаил Соров Ытык Күөлгэ тулаайах оҕолор дьиэлэрин тутуу тула социальнай ситимҥэ тарҕаммыт сураҕы быһаарда. Тулаайах оҕолорго тутуллуохтаах дьиэ уһун болдьохтоох тутуу буолбутугар буруйдаах биллиэхтээх, диир кини. Билигин дьиэни туппут бэдэрээччиккэ — «Стимул-88» тэрилтэҕэ дьыала тэриллибит.

Улуус баһылыга иһитиннэрбитинэн, 2014 сыллаахха республикаттан харчы көрүллэн Ытык Күөлгэ тулаайах оҕолорго 20 квартиралаах дьиэ тутуута саҕаламмыта. Ол сыл атырдьах ыйыгар дьиэни тутууга аукцион-күрэх ыытыллыбыт. Кыайыылааҕынан Дьокуускайга баар ХЭТ «Стимул-88» диэн тэрилтэ ааттаммыт.

«Бу дьону харахтаан да көрбөтөҕүм», — диир Соров.

«Бу дьиэ тоҕо долгострой буолла, проегар, сметатыгар алҕастардаах дуу, диэн толкуйдуур этим. Дьыаланы билсэн баран, тоҕо маннык буолбутун билэн олоробун. Ол кэмҥэ атырдьах ыйын 15 күнүттэн мин уоппускаҕа сылдьабын. Харчы кэлбит, куонкурус ыытыллыбыт, кыайыылааҕы быһаарбыттар, докумуоҥҥа барыта сурулла сылдьар, онтон аны аванс биэрэн киирэн барбыттар», — диэн быһаарар баһылык.

Ити «Стимул» тэрилтэ салайааччытыгар буруйу оҥоруу састааба баар диэн ИДьМ Силиэстийэлиир чааһыгар дьыала көбүтүллүөн наада диэн барбыт, ол гынан баран күн бүгүн көбүтүллэ илик.

Хара балыырга түбэһэн сылдьар куһаҕан, дьиҥнээх буруйдаахтар биллиэхтэрин наада, диэтэ кини. Соров этэринэн, билигин дьиэ Росреестрга регистрацияланан, үлэҕэ киирэн турар.

Хаартыска СИА