Өрөспүүбүлүкэтээҕи бойобуой дьайыылар бэтэрээннэрин ассоциациятын бэрэссэдээтэлэ Иван Черкашин

САХА СИРЭ. ДЬОКУУСКАЙ. Олунньу 15 күнэ — ULUS.MEDIA. Бүгүн, олунньу 15 күнүгэр, Сэбиэскэй сэбилэниилээх күүстэр Афганистантан тахсыбыт күннэрэ бэлиэтэнэр. Бу күн Саха сирин Ил Дархана Айсен Николаев бойобуой дьайыы бэтэрээннэрин кытта көрүстэ. Манна кинилэр патриотическай иитии, байыаннайдары реабилитациялааһын туһунан кэпсэттилэр, инники былааннары торумнастылар уонна тус бэйэлэрин этиилэрин киллэрдилэр.

Өрөспүүбүлүкэтээҕи бойобуой дьайыылар бэтэрээннэрин ассоциациятын бэрэссэдээтэлэ Иван Черкашин соторутааҕыта анал байыаннай дьайыы бара турар сиригэр сылдьан кэлбит. Онно тиийэн саҥа барбыт уолаттары инники кирбиигэ сылдьар, номнуо уопутурбут уолаттарга билиһиннэрбиттэр, бииргэ илдьэ сылдьан үөрэтэллэригэр көрдөспүттэр. Итинэн сибээстээн бүгүҥҥү көрсүһүүгэ Иван Черкашин Ил Дархаҥҥа хас да ыйытыыны биэрдэ. Олортон сүрүнэ – анал байыаннай дьайыыга барарга бэлэмнэнэр дьону үөрэтэр “Боотур” киини өйөбүл боппуруоһа.

“Билигин биһиги инспектордарбыт үлэлэрин өссө күүһүрдэн биэрэрбит тоҕоостоох. Кинилэр син биир быраас курдуктар, кэмиттэн кэмигэр саҥа сааларга, тактика өттүгэр такыллан иһиэхтээхтэр. Ол түмүгэр, үөрэҕи ааспыт уолаттар билиилэрэ хаҥыахтаах. Бу, бастатан туран, саха дьоно көмүскэллээх уонна бэйэтин харыстанар кыахтаах буоларын туһугар ыытыллар, онон Ил Дархан биһиги этиибитин иһиттэ уонна ылынна”, — диэтэ кини.

Намнааҕы “Буойун” түмсүү салайааччыта, бойобуой дьайыы бэтэрээнэ Павел Оконешников улууска оҕолору патриотическай иитии үлэтэ хайдах ыытылларын туһунан кэпсээтэ. Кини Айсен Николаевтыын көрсүһүүгэ саҥа этиилэри киллэрдэ уонна түмсүү үлэтигэр туох ыарахаттар баалларын чопчулаата:

Намнааҕы “Буойун” түмсүү салайааччыта, бойобуой дьайыы бэтэрээнэ Павел Оконешников

“Биһиэхэ, Хатыҥ Арыы оскуолатыгар, үөрэнээччилэри патриотическай иитиинэн дьарыктанар туспа үлэһит штата көрүллэрэ буоллар олус үчүгэй буолуо этэ диэн санаабын эттим. Ону тэҥэ, лааҕыр үлэлэтэрбитигэр материальнай техническэй өттүнэн көмөлөһөллөрүгэр көрдөстүм. Билиҥҥи аан дойдуга буола турар быһыыга-майгыга кыайыылаах тахсыахтаахпыт, ол туһугар үүнэр көлүөнэни төрөөбүт дойдуну таптыырга үөрэтиэх тустаахпыт дии саныыбын”.

Мэҥэ Хаҥалас улууһун бойобуой дьайыылар бэтэрээннэрин түмсүүтүн салайааччыта Николай Семенов Ил Дархан эдэр ыччакка уонна оҕолорго патриотическай тыыны иҥэриигэ сүрүн болҕомтону уурбутун сэргии истибит.

Мэҥэ Хаҥалас улууһун бойобуой дьайыылар бэтэрээннэрин түмсүүтүн салайааччыта Николай Семенов

“Биһиги улуус иһигэр байыаннай оонньуулары, уруоктары, кылаас чаастарын, араас көрсүһүүлэри ыытарга көмөлөһөбүт. Бүгүҥҥү көрсүһүүгэ Айсен Николаев патриотическай иитии үлэтин күүһүрдэрбитигэр соруйда. Онно, биллэн турар, кини торумнаабыт сыаллара, этиилэрэ тирэх буолуохтара”, — диэн кини үллэһиннэ.

Ааптар хаартыскаҕа түһэриилэрэ