САХА СИРЭ. ДЬОКУУСКАЙ. Олунньу 14 күнэ — ULUS.MEDIA. Тыа сиригэр сүөһүлээх-сылгылаах ыаллар, хаһаайыстыбалар кыстык иккис аҥаарын хонуктарын кээрэтэллэр. Бу кэмҥэ кыбыыга киирбит от, чүмэчи сыатын курдук, куччаан барар. Кырыымчык оттоохторго кыһалҕа кытаатар. Быйылгы кыстыкка өрөспүүбүлүкэ үрдүнэн 40 426,34 туонна от тиэйиллиэхтээх.

Ааспыкка, олунньу 1 күнүгэр, “17 улууска 37 229,94 туонна от тиэйиллэрэ былааннанар” диэн суруйбутум. Уонча хонук иһигэр сайаапка 3 196,4 туоннанан эбиллибит. Испииһэккэ Ньурба улууһа уонна Дьокуускай куорат киирэн биэрбиттэр. Ньурбалар 1 732,50, дьокуускайдар 1 212 туонналыы оту тиэйтэрэргэ сайаапкалаахтар.

Бу кэмҥэ тиэйиллиэхтээх кээмэйтэн 65 бырыһыана кыбыыны булбут. Манна сыһыаран суруйдахха, ааспыттааҕы кээмэйдэригэр Бүлүү улууһа 555,9, Мэҥэ Хаҥалас улууһа 58 туонналыы оту эбии атын улуустартан тиэйтэрэргэ сайаапкалаабыттар. Ол оннугар аммалар 330, томполор 32 туонналыы отунан аҕыйаппыттар. Сайаапкалаах отун барытын ааспыт сылга тастыбыт Мииринэйтэн ураты Аммаҕа 99, Чурапчыга 89, Бүлүүгэ 88, Намҥа 79, Куорунайга 70 бырыһыаннарын тастыбыттар.

Эбээн Бытантайга уонна Эдьигээҥҥэ от тиийэ илик. Үөһээ Дьааҥыга 600 туонна оттон 31,68 туонната өрдөөҕүтэ тиксэриллибитин кэнниттэн ахсаан салҕаммакка турар. Отунан быстаран эрэр Өлөөн Ээйигэр бастакы сырыыга 36 туонна от (тиэйиллиэхтээх кээмэйтэн чиэппэрэ) тиийдэ.

Сүөһүгэ-сылгыга эбии аһылык 8 улууска тиэйиллиэхтээҕиттэн Чурапчыга лаппа чугаһаттылар: 500 туонна уотурба, 400 туонна эбиэс барыта таһылынна, арай, 431 туонна бытарытыллыбыт окко сайаапкалаабыттарыттан 30-ча эрэ туонната илик, ону бу күннэргэ ситэриэхтэрэ (туолуута – 97,90%). Саамай элбэх эбии аһылык (1 731,440 туонна) тиийиэхтээх Бүлүү улууһугар 40-ча бырыһыана таһыллыбыт. Өлөөҥҥө 37 уонна Эбээн Бытантайга 25,1 туоннаҕа сайаапкалаахтарыттан билиҥҥитэ иликтэр.

Эбии аһылыгы тиэйиигэ оператор-тэрилтэ “Якутопторг” АУо салалтата иһитиннэрэринэн, барыта 5 001,69 туонна таһаҕас тиэйиллиэхтээҕиттэн 2 822,98 туонната, ол эбэтэр 56,44 бырыһыана аналлаах сиригэр тиксэриллибит. Ордубут 2 178,71 туонна эбии аһылык айаҥҥа сылдьар: 1 819,30 туонната Аллараа Бэстээххэ тимир суолунан айаннаан иһэр, 358,76 туонната Аллараа Бэстээхтэн хоҥнон, улуустар хайысхаларын тутуспут.

Василий Никифоров. Хаартыска: «Амма олоҕо» хаhыат