Билиҥҥи сайдыылаах, тэтимнээх олох устун үлэлии-хамсыы, үүнэ-сайда олорон оҕолорбут төрөөбүт төрүт тылларын булкуйан, төрүт дьаалыларынан толкуйдуур кыахтарыттан матан олороллорун өмүрэх курдук биирдэ өйдүү түһүөхпүт эбитэ буолуо – өскөтүн төрөөбүт тылбытыгар таптал суоҕа буоллар. Сылтан сыл оҕону төрөөбүт тылынан иитии боппу­руоһа күүһүрэн, оннун булан иһэргэ дылы. Онно хас биирдии дьиэ кэргэн болҕомтотун ууран, сахалыы иитиини тэрийэр дуо, оҕо нууччалыы тылынан саҥарарыгар аҥаардас гаджеты эрэ буруйдуу олорорбут дуу диэн ыйытыы бүгүн эмиэ үөскээтэ.

Сахаяна Иванова, Уһун Күөл “Чуораанчык” уһуйаанын мэтэдьииһэ:

– Дьиэ кэргэҥҥэ сахалыы эйгэни үөскэтии бастатан туран, сахалыы иитииттэн тахсар. Хас биирдии киһи төрөөбүт тылын, омугун, сиэрин-туомун өрө тутан сылдьар буол­лаҕына, дьиэ кэргэн оннук санаанан салайтаран оҕотун иитэр-такайар. Саха омук ис эйгэтигэр, дууһатыгар өбүгэтин ситимин илдьэ сылдьар. Ону сөпкө өйдөөн, таба туттан дьиэ кэргэҥҥэ сахалыы тыыны, эйгэни үөскэтиэххэ сөп. Биһиги дьиэ кэргэҥҥэ оҕолорбутун сахалыы тыыҥҥа иитиигэ өбү­гэлэрбититтэн кэлбит үтүө үгэстэри туһанабыт. Ол курдук алаадьылаан сыт таһааран, эһэкээммитин аһатабыт. Сахалыы кэпсэтэн, норуот тылынан уус-­уран айымньыларын нөҥүө өс хоһооннору туттан, ис хоһоо­нун быһааран, остуо­руйалаһан уонна саха суру­йааччыларын айымньыларын ааҕан, сахалыы кинигэни ааҕарга дьулуһарга, таптыырга иитэбит-такайабыт.

Аня Копырина, Дьокуускай олохтооҕо:

– Дьокуускайга көһөн кэлбиппит сыл буолла. Уус Алдаммыт наһаа сахалыы эйгэлээх улуус. Онон кыргыттарым кыра ­саастарыттан сахалыы уһу­йул­лубут буоланнар, манна кэлэн сахалыы да, нууччалыы да үчүгэйдик саҥараллар. Ол эрээри кыра уолум олох кыратыгар кэлбит буолан буккуллар-тэккиллэр. Дьиэтигэр сахалыы саҥарар, уһуйааныттан нуучча буолан кэлэр. Манна аҥаар­дас гаджет эрэ буруйа буолбакка, уопсайынан кэлиҥҥи бириэмэҕэ төрөппүттэр оҕолорун кытта нууччалыы кэпсэтэр буолбуттар. Биһиги дьиэбитигэр сахалыы кэпсэтэбит, сахалыы кинигэлэри ааҕабыт. Куоракка уһуйаан, оскуола саха тыллаах бөлөҕө, кылааһа аҕыйаабыта хомолтолоох.

Надежда Протодьяконова, Мүрү нэһилиэгин олохтооҕо:

– Оҕону сахалыы иитии төрөппуттэн улахан тутулуктаах. Билигин улахан дьон да сатаан үчүгэйдик сахалыы саҥарбаттар. Бэйэм да сорох уустук тыллары өйдөөбөппүн. Хата, эбэлээх эһэбит үөрэтэллэр. Кыыһым кинилэри кытта алтыһан, сорох сахалыы тыллары бэйэбинээҕэр ордук билэр. Мин кыыспыттан уонна кэргэммиттэн дьиэ иһигэр олох сахалыы саҥаралларын ирдиибин. Тоҕо диэтэр, кыра кыыспыт саҥа тылланан эрэр. Улахан кыыһым уһуйааҥҥа уонна алын кылааска сылдьан олоҥхоҕо дьарыктанара. Нууччалыы эмиэ хоһоон аахтаран күрэстэргэ кытыннарар этим. Ол иһин сахалыы да, нууччалыы да чуолкайдык саҥарар. Оҕону сахалыы, нууччалыы булкуйбакка, икки тылынан ыраастык саҥара үөрэтиэххэ наада.

Ульяна Герасимова, Кэптэни бөһүөлэгин олохтооҕо:

– Билиҥҥи үйэҕэ гаджет боппуруоһа сытыытык киирдэ. Онно оҕо үгүстүк нууччалыы тыллаах видеолары көрөр. Оонньуулара эмиэ нууччалыы, английскайдыы суруктаах-бичиктээх. Итинтэн сыл­таан оҕо тыла, өйө-санаата буккуллара-тэккиллэрэ биллэр. Ол гынан баран, төрөппүт иитиититтэн тутулуктаах. Хас биирдии дьиэ кэргэн дьиэтигэр уу сахалыы кэпсэтиэхтээх. Биһиги оҕобут кыра эрдэҕиттэн сахалыы остуоруйалары, кэпсээннэри ааҕар.

Кэпсэттилэр Светлана Сивцева, Мария Аргунова, «Мүрү саһарҕата»