Бүгүн анаан көрсүбүт дьоммун дьоҕус дэриэбинэ тэбэр сүрэҕин чопчулара диэтэхпинэ, сөбүлэһиэххит дии саныыбын. Былыр ыал аҕата туох эрэ кыһалҕаттан маһын мастананан оһоҕун оттор кыаҕын сүтэрдэҕинэ, бу ыал барахсан оһохторо умуллан, ыал устун барар кыһалҕалара тириирэ. Саха омук атын омуктан сүрүн уратыбыт итиннэ сытар. Билигин бу ититиинэн хааччыйар, туох баар ыарахан үлэбитин толорон олорор, норуокка коммунальнай хаһаайыстыба эбэтэр «хачыгаардар» диэн ааттыыр дьоммут биир күн оһоҕу оттубатылар да, быһата бүтэр буоллахпыт дии.

Далыр нэһилиэгэр икки тэрилтэҕэ аҥардас эр дьон үлэлиир. Аныгы олох сиэринэн кинилэр элбэх дьиэ, тэрилтэ холбоммут ситимин итиинэн хааччыйаллар. Уонна нэһилиэнньэлээх пууннарга куттал суоһаабатыгар, сыыһа-халты тахсыбатыгар күүс-көмө буолан, тириир ыарахан түбэлтэҕэ тута көмөҕө кэлэр нэһилиэнньэ ааттыырынан «баһаарынайдар» хамаандалара.

Икки тэрилтэ иккиэн уопуттаах, кэлэктиип убаастабылын ылбыт салайааччылардаахтар. Баһаарынайдарга — Семенов Иван Егорович. Онтон коммунальнайдарга — Гаврильев Константин Афанасьевич. Иккиэн тустаах үлэлэригэр өрөспүүбүлүкэ үлэҕэ туйгуннара.

Бу дьоҕус үлэ кэлэктиибтэрэ олохтоох нэһилиэнньэ олоҕор биллэр-көстөр оруолу ылаллар. Тустаах үлэлэрин эҥкилэ суох толороллорун таһынан нэһилиэк культурнай-духуобнай олоҕо сайдарыгар сэмэй кылааттарын киллэрэ, киэһэ өттүгэр бэйэлэрэ этэллэринии «ыга киэргэнэн ыллыы-үҥкүүлүү ойуохтара». Хас ыытыллар субуотунньук, араас спортивнай күрэх эмиэ кинилэрэ суох сатаммат.

Саамай сэргээбитим бу уолаттартан ордук баһаарынайдара, норуокка этэллэринии «саҥа тыынынан тыыннаммыт дьон» эбиттэр. Ону туоһулаан ким төһө сүөһүлээҕин-сылгылааҕын кэпсээбиттэрэ үчүгэйиин. Бүгүн педагогическэй үөрэхтээһин дьарыгар сылдьыбыт тоҕус киһиттэн аҕыһа ыал аҕалара, эһэлэрэ. Кинилэр бука бары ураа муостааҕы иитэр, дьөһөгөй оҕотун тутан олорор, оҕуруоттаах, чааһынай дьиэлээх-уоттаах дьон.

Саастаах киһи быһыытынан кэс тылбын кэпсээн баран: «Барыта үтүө санааҕыт хоту туола турдун! Сытыы тыллаах быһа эппэтин, кырыы харахтаах кынчарыйбатын, барыта этэҥҥэ эрэ буоллун!» — диэн алҕаан араҕыстым.

К.С.Чиряев аатынан норуот педагогикатын түмэлин мэтэдииһэ Валентина Осипова