Биллиилээх государственнай, политическай диэйэтэл, биир дойдулаахпыт, саха чулуу уола Максим Кирович Аммосов аатын сүгэр Култуура дыбарыаһа бүгүҥҥү күҥҥэ Нам улууһун олохтоохторугар, ыалдьыттарыгар киэҥ аана тэлэччи арылынна.

Баараҕай тутуу киэҥ-куоҥ саалалара дьонун-сэргэтин, ыалдьыттарын, олохтоохторун, сылаас тыынынан үөрэ көрүстэ. Оҕолуун-уруулуун, эдэрдиин-эмэнниин, тобус-толору туолбут киэҥ саала быыһа оргууй арыллан, «Семинария паартатыттан — Автономия трибунатыгар» диэн олус үчүгэй, үрдүк таһымнаах испэктээх көрдөрүлүннэ.

Наммыт улууһун оҕолоро, ыччаттара, дьоһун мааны дьоно олус да талааннаахтарын көрөн сөхтүбүт-махтайдыбыт. Артыыстартан туох да уратыта суох олус бэркэ саҥаран-иҥэрэн, туттан-хаптан, таҥнан-симэнэн, дьиҥнээхтик оруолларыгар киирэн, күүстээх тыыннаах испэктээҕи буола турар киинэ хартыынатыныы оонньоон көрдөрбүттэриттэн сүргэбит көтөҕүлүннэ. Көрөөччүлэр сүһүөхтэригэр туран ытыс дохсун тыаһынан «Ураа!» хаһыы саҥатынан махтаналлара испэктээх сүүс бырыһыан толору сиппитин-хоппутун, толору арыллан оонньоммутун, чахчы чаҕылхай испэктээх туруоруллубутун көрдөрөр.

Туруорааччы режиссёр Иван Новиков үлэтин үрдүктүк сыаналаан туран, улахан махталбытын биллэрэбит. Өссө да талааннаах ыччаттары, дьоҥҥун-сэргэҕин искусство киэҥ эйгэтигэр таһаара тураргар. Чаҕылхай Махсыым уонна кини доҕотторун туһунан олус чаҕылхай испэктээх туруорулунна.

Саҥа аһыллыбыт дыбарыаспыт бэйэтин аатын да сүгэринии чаҕылхайтан чаҕылхай тэрээһиннэри, саҥаттан саҥа айымньылары, үгүс үтүө тэрээһиннэри бэлэхтии, таһаара туруохтун.