Орто Халыма улууһун Г.Г. Софронов аатынан Өлөөкө-Күөл орто оскуолатын 11 кылааһын үөрэнээччитэ Вова Винокуров быйылгы Ил Дархан Харыйатыгар барар үрдүк чиэскэ тигистэ. Вова кыра кылаастан ыла үөрэх ударнига, көрсүө-сэмэй майгылаах, спортсмен. Кини уһанарын, уруһуйдуурун олус сөбүлүүр. Ол курдук оскуолаҕа, улууска ыытыллар араас уруһуй, илиинэн оҥоһук куонкурустарын, быыстапкаларын көхтөөх кыттааччыта уонна кыайыылааҕа буолар.

Оттон үөрэҕин чааһыгар: IV–с республикатааҕы «Мин ийэ тылым» диэн саха тылын олимпиадатын, I-кы республикатааҕы куйаар ситиминэн ыытыллыбыт фольклор күрэҕин, «Алампалыын алтыһыы» кэтэхтэн аһаҕас республикатааҕы олимпиада призердара, «Өбүгэ үөрэҕэ — омук баайа» республикатааҕы кэпсээн, өйтөн суруйуу, ыстатыйа куонкуруһун

кыайыылааҕа, Бүтүн Россиятааҕы үөрэнээччилэр олимпиадаларын биология, саха литературата предметтэрин призера.

Маны таһынан, Вова — айылҕа оҕото. Кини сайын аайы олохтоох сылгы собуотугар сылгыһытынан үлэлиир аҕатын кытта Чоҥкуйа учаастагар сылгыһыттыы барсар. Сайын, кыһын бултуурун, балыктыырын, туһахтаан куруппааскылыырын олус сөбүлүүр.

Кылааһыгар солбуллубат уруһуйдьут. Онон эркин хаһыата, кылаас киэргэтиитэ кинитэ суох сатаммат. Оскуолаҕа «Аргыс» оҕо түмсүүтүгэр спорт миниистирэ дуоһунастаах. Сөбүлүүр предметтэрэ — биология, физкультура. Оскуолатын бүтэрдэҕинэ, летнай училищеҕа туттарсар баҕалаах.

Вовабыт оскуолатын бүтэрэн, талбыт үөрэҕэр туттарсан, сөбүлүүр идэтинэн үлэлиир бастыҥ үлэһит буолуо диэн эрэнэбит, ситиһиилэри баҕарабыт!

keskil14