Волейболга Хара нэһилиэгин Куубагар сытыы киирсиилэр саҕаланнылар

Ахсынньы 17 ‒ 18 күннэригэр волейболга эр дьон хамаандаларын ортотугар «Хара нэһилиэгин Куубагар» бастыыр иһин өрөспүүбүлүкэтээҕи аһаҕас турнир ыытыллар.

Бу өрөспүүбүлүкэ таһымнаах улахан күрэхтэһиинэн Хара нэһилиэгин төрүттэммитэ 385 сылыгар аналлаах быйылгы үбүлүөйдээх тэрээһиннэрэ түмүктэнэллэрэ түбэһиэхчэ буолбатах. Хара нэһилиэгин дьоно-сэргэтэ улууспутугар, өрөспүүбүлүкэбитигэр успуорт сайдыытыгар киллэрбит кылааттара, үтүөлэрэ-өҥөлөрө урут да, билигин да үгүс. Кинилэр ортолоругар бааллар: аатырбыт мэхэньисээтэр, рационализатор, 1963 с. матасыыкылынан кросска өрөспүүбүлүкэ чөмпүйүөнэ Павел Дмитриев‒Бачыым Байбал, чэпчэки атлетикаҕа өрөспүүбүлүкэ элбэх төгүллээх чөмпүйүөнэ, сүүрүк Афанасий Илларионов, сахалыы атах оонньууларыгар рекордсмена, өрөспүүбүлүкэ элбэх төгүллээх чөмпүйүөнэ Дмитрий Назаров, буоксаҕа аан дойду чөмпүйэнээтин үрүҥ көмүс призера, Европа икки төгүллээх, Арассыыйа биэс төгүллээх чөмпүйүөнэ Василий Егоров, хотугу многоборьеҕа өрөспүүбүлүкэ рекордсмена, Саха сирин норуоттарын VIII Оонньууларын чөмпүйүэнэ Егор Терентьев о.д.а.

Бүгүн, ахсынньы 17 күнүгэр күнүс 12 чаастан, И.Г.Игнатьев аатынан Харатааҕы успуорт оскуолатыгар күрэхтэһиини үөрүүлээхтик аһыы буолан ааста. Ыраахтан-чугастан кэлбит ыалдьыттарга алгысчыт Виталий Очиров сахалыы сиэринэн-туомунан алгыс үтүөтүн анаата.

Муниципальнай оройуон баһылыга Дмитрий Тихонов, Хара нэһилиэгин баһылыга Дария Назарова уонна волейболга өрөспүүбүлүкэтээҕи федерация толорооччу дириэктэрэ Яков Сивцев күрэхтэһии кыттыылаахтарын эҕэрдэлээтилэр уонна хамаандаларга үрдүк ситиһиилэри баҕардылар.

‒ Оҕолорго, ыччакка чөл олохтоох уонна чэбдик буолууларыгар, олоххо миэстэлэрин булунууларыгар успуорт араас көрүҥүнэн дьарыктаныы төһүү күүс, тирэх буолар. Маннык күрэхтэһиилэр ыытыллаллара олус наадалаах уонна сөптөөх дьаһаллар. Өрөспүүбүлүкэ волейболга бастыҥ хамаандаларын бүгүн манна нэһилиэк Куубагар түмпүтүгэр Дария Ивановнаҕа тус бэйэм истиҥ махталбын тиэрдэбин. Саҥаттан-саҥа ааттар үүнэ-сайда турдуннар. Саха волейбола Арассыыйаҕа тиийэ дорҕоонноохтук ааттанарыгар мин баҕа санаабын тиэрдэбин, ‒ диэтэ улуус баһылыга Дмитрий Тихонов.

Күрэхтэһиигэ барыта 10 хамаанда икки бөлөҕүнэн илин-кэлин күрэс былдьаһар. Кыайыылаах хамаандаҕа Куубак уонна улуус баһылыга туруорбут убаһа бириэмийэтэ туттарыллыаҕа. Турнир сүрүн успуонсара ‒ «Хара нэһилиэгэ» тыа сирин түөлбэтин дьаһалтата иккис миэстэни ылбыт хамаандаҕа 30 000, үһүс миэстэҕэ 20 000 солкуобайдаах бириистэри туттарыаҕа. Турнир бирииһин уопсай пуондата ‒ 250 тыһыынча солкуобай.

Күрэхтэһии успуонсардарынан «Мэҥэ Хаҥалас улууһа» муниципальнай оройуон дьаһалтата (баһылык Дмитрий Тихонов), «АрктикаСтрой» ХЭТ (бырааттыы Петр, Иван, Николай Никифоровтар), Хара олохтоохторо Зинаида, Гаврил Егоровтар, Василий, Николай, Михаил Егоровтар, Хара нэһилиэгин дьокутааттарын сэбиэтэ, Харатааҕы успуорт оскуолата (дириэктэр Алексей Стручков), «Кэрэчээн» оҕо уһуйаана (сэбиэдиссэй Юлиан Захаров), «Айыллаан» култуура уонна сынньалаҥ киинэ (дири5эктэр Василий Плотников), Табаҕаттан чааһынай урбаанньыт Роман Герасимов, «Астык Амтан» ХЭТ (салайааччы Сардаана Назарова), Хара нэһилиэгин бааһынай хаһаайыстыбаларын түмсүүтэ, нэһилиэк ыччата, спортсменнара, дьахталларын сүбэтэ, «Атастыылар» эдэр аҕалар түмсүүлэрэ буоллулар. Успуонсардар көмөлөрүнэн 12 анал бириис олохтонно.

Нэһилиэк баһылыга Дария Назарова бу күрэхтэһиини нэһилиэктэригэр тэрийэллэригэр сыл устата туруорсан федерация сөбүлэҥин ылбыттарын, нэһилиэк олохтоохторо бүттүүн күүс-көмө, өйөбүл буолбуттарын бэлиэтээтэ.

Күрэхтэһии хаамыытыттан кылгастык билиһиннэрдэххэ, «А» бөлөххө Таатта, ХИФУ 1-кы №-дээх, Нам, Мэҥэ Хаҥалас, Дьокуускай куорат, оттон «Б» бөлөххө ХИФУ 2-с №-дээх, Чурапчы, Горнай, Амма, Хара нэһилиэгэ киирдилэр.

Бастакы көрсүһүүлэр түмүктэрэ маннык: «А» бөлөххө Таатта ‒ Мэҥэ Хаҥалас 2:1; Таатта ‒ Нам 2:0; ХИФУ 1-кы №-дээх ‒ Дьокуускай 2:1; ХИФУ 1-кы №-дээх ‒ Мэҥэ Хаҥалас 2:0.

«Б» бөлөххө ХИФУ 2-с №-дээх ‒ Горнай 2:1; Чурапчы ‒ Амма 2:0; Хара ‒ ХИФУ 2-с №-дээх 2:0; Амма ‒ Хара 2:0; Чурапчы ‒ Горнай 2:0.

Читайте дальше