1972 сүүнэ улахан үбүлүөйдээх сыл этэ. Саха АССР 50 сылын тэҥэ ССРС 50 сыла киэҥник бэлиэтэммитэ. Сунтаарбыт сэлиэнньэтигэр ити икки бэлиэ түгэннэри үйэтитээри анал бэлиэ тутуллубута.

«Ильич уоттара» 1972 сыл ахсынньы 12 күнүнээҕи нүөмэригэр «Доҕордоhуу сэргэтэ» диэн ыстатыйа тахсыбыта. Онно бу курдук суруллубут: «Ахсынньы 9 күнүгэр күнүс 11 чаастан Сунтаар сэлиэнньэтин олохтоохторо, үөрэнээччилэрэ, араас транспарант тутуулаах, оройуоннааҕы Культура дьиэтин таhыгар мусталлар. Ити күн, ССРС тэриллибитэ 50 сылыгар аналлаах «Доҕордоhуу сэргэтэ» уус-уран оҥоhуулаах монумент аhылынна. Монумент ис хоhоонун кэпсээн туран, райсовет исполкомун председателин солбуйааччы Иванов К.А. үөрүүлээх миитини аhар. Ол кэнниттэн үлэ ветерана Михайлов М.П., комсомол райкомун бастакы секретара Попов Л.В. эҕэрдэ тылы эттилэр. Партия райкомун секретара Яковлев П.К., аны 50 сыл буолан баран көрүллүөхтээх, оройуон билиҥҥи бириэмэтинээҕи экономикатын, культуратын көрдөрөр историческай сурук тексин ааҕан иhитиннэрэр уонна латуннай хоруопкаҕа угуллан монумеҥҥа хараллыахтааҕын туhунан эттэ. Бу монумены художник Шарапов Н.Н., архитектор Саввинов Г.Н. оҥордулар».

Итиннэ эбии архыып докумуоннара тугу кэпсииллэр? Үлэhиттэр дьокутааттарын Сунтаар эбиэтин исполкомун 1972 сыл алтынньы 18 күнүнээҕи мунньаҕын боротокуолугар ааҕабыт: «Сунтаар сэлиэнньэтин тупсаран оҥорууга благоустройства перечнин 15 пуунугар сөп түбэhиннэрэн художественнай-декоративнай оформлениеҕа сельсовет исполкомун бигэргэтиитигэр киллэриллибит сментаны 7500 солкуобай сумманан бигэргэтэргэ. Сельсовет бухгалтера т. Егорова Е.П. оҥоhуллар үлэ бүтэн комиссиянан тутуллубутун туhунан аакка төрүттэнэн харчытын төлүүрүгэр соруйарга». Боротокуол быhаарыытыгар смета сыhыарыллыбыт. Смета толору аата бу курдук суруллубут: «Смета на строительство архитектурно-декоративной формы «Сэргэ дружбы народов» в связи с оформлением райцентра с. Сунтар к празднованию 50-летия со дня образования СССР».

Ити баараҕай оҥоhук хайдах айыллан тахсыбытын, туохтан оҥоhуллубутун сметаттан көрөн билэбит: «ручная рубка по мраморной плите герба СССР», «заливка декоративной вазы «чорон» с выполнением опалубочных работ из железобетона», «то же декоративной фигурной головки коня с выполнением формовочной опалубочных работ из железобетона», «выполнение орнаментов сложной конфигурации по бетонной поверхности», «ручная резьба по мраморной плите с надписью», «изготовление форм из гипса сложной конфигурации и гончарной глины для заливки герба СССР, головок коня, «чороона».

1970-с – 1980-с сылларга «Доҕордоhуу сэргэтэ» Сунтаар символа, неофициальнай гиэрбэтэ буолбута. Билиҥҥилии эттэххэ Сунтаар брендэ этэ. Сэргэ омооно хаhыаттарга, ыhыах програмкаларыгар, брошюраларага бэчээттэнэн Саха сирин олохтоохторо бары билэр символлара буолбута.

Латуннай хоруопкаҕа угуллубут сурук билиҥҥилии «капсула времени» диэн ааттанар. Быйыл ахсынньыга хараллан сыппыта 50 сыл туолан арыйыллыахтаах этэ. Ол гынан баран, 1990-с сылларга эдэр ыччат дуу, оҕолор дуу ити суругу хостоон суох оҥорбуттар диэн олохтоохтор кэпсииллэр. Сурук куоппуйатын бэтэрээннэр сэбиэтттэрин бэрэссэдээтэлэ Афанасий Васильев хас да сыл көрдөттө да туох да түмүгэ суох. Бэл, Саха Ѳрөспүүбүлүкэтин Национальнай архыыбыгар запростуу сылдьыбыппыт да эмиэ туох да, көстүбэтэ.