Үчүгэй нэһилиэгэр үгүс элбэх оҕолоох эдэр ыал түөлбэлээн олорор. Манна төрүт олохтоох дьон сыдьааннара алаһа дьиэ тэринэн, оҕо-уруу төрөтөн удьуор утумун салҕыыллара хайҕаллаах суол.

Олортон биирдэстэринэн түөрт оҕолоох Мария уонна Карим Атласовтар буолаллар.

Эдэр дьон 2010 сыллаахха харахтарынан хайҕаһан, сүрэхтэринэн сөбүлэһэн, дьылҕаларын холбообуттара. Ол дьыл Кэбээйи Сииттэтиттэн төрүттээх килбик кийиит кыыс Мария доҕорун Карим төрөөбүт дойдутугар – чысхаан тымныылаах Өймөкөөҥҥө көһөн кэлбитэ.

Эдэр ыал Атласовтар түөрт көмүс чыычаахтарыгар күн сирин көрдөрөн, күөх халлааҥҥа көтүтэн, ийэ-аҕа тапталын биллилэр.

Күннэрэ-ыйдара үс уолаттарыттан, биир кэрэчээн кыталык кыыстарыттан тахсар.

Кэрэхсэбиллээҕэ диэн, саамай кыра уоллара Эркин Саха АССР төрүттэммитэ 100 сыллаах үбүлүөйдээх дьылыгар төрөөн, Ил Дархан Айсен Николаев олохтообут «Үйэ оҕото» хапытаалын хаһаайына буолбута. Күн сиригэр кэлээт, төрөппүттэригэр дьоһуннаах бэлэҕи аҕалбыт уолчаан билигин номнуо алта ыйын ааста.

Кэлиҥҥи сылларга дойдуга оҕолоох дьиэ кэргэни өйүүргэ үгүс дьоһуннаах көмө оҥоһуллар буолла. Улуус баһылыга Иннокентий Сивцев үбүлүөйдээх сылга Өймөкөөн улууһугар төрөөбүт оҕолорго биир кэмнээх төлөбүрү анаабыта эмиэ кэрэхсэбиллээх дьыала.

Бу туһунан сиһилии “Хотугу сардаҥа” хаһыакка ааҕаарыҥ.